ଦୁନିଆରେ ପ୍ରତ୍ୟେକ ମନୁଷ୍ୟ କିଛି ଖାସ କାମ ପାଇଁ ଜନ୍ମ ନେଇଥାଏ । ତେଣୁ ମନୁଷ୍ୟକୁ ଭଲ କର୍ମରେ ନିୟୋଜିତ ହେବା ପାଇଁ ଏବଂ ନିଜ ସଫଳତା ପାଇବା ରାସ୍ତାରେ ଯେତେ ବାଧା ଆସୁ ସବୁକିଛିକୁ ସମାଧାନ କରି ଆଗକୁ ବଢିବାକୁ ପଡ଼ିଥାଏ । ଆଉ ଦୁନିଆରେ ସେହି ବ୍ୟକ୍ତି ସବୁବେଳେ ଶାନ୍ତ ରହିଥାଏ ଯେଉଁ ବ୍ୟକ୍ତିର ପ୍ରତିଭା ତାର କ୍ଷମତାକୁ ବର୍ଣ୍ଣନା କରିବା ପାଇଁ ଯଥେଷ୍ଟ ହୋଇଥାଏ । ସେହି ମଣିଷ ହିଁ ସଫଳତା ଲାଭ କରିଥାଏ ଯିଏ ଅଧ୍ୟବସାୟ ଏବଂ ପରିଶ୍ରମକୁ ବଜାୟ ରଖିଥାଏ । ତେବେ ବିଶ୍ୱାସ ଏମିତି ଏକ ଜିନିଷ ଯାହାଦ୍ୱାରା ସବୁକିଛି କ୍ଷଣରେ ବଦଳିଯାଏ । ସେଥିପାଇଁ ଏହା ମଧ୍ୟ କୁହାଯାଇଛି ଯେ ବିଶ୍ୱାସ ହିଁ ଭଗବାନ ।
କୌଣସି କାମରେ ସେତେ ପର୍ଯ୍ୟନ୍ତ ଚେଷ୍ଟା କରିବା ଉଚିତ ଯେତେ ପର୍ଯ୍ୟନ୍ତ ସଫଳତା ନଆସିଛି । ଯେଉଁ ବ୍ୟକ୍ତି ଥକି ଯାଇ ବସିଯାଏ ସେ କେବେବି କେଉଁ କାମରେ ସଫଳତା ହାସଲ କରିପାରେ ନାହିଁ । ମନୁଷ୍ୟକୁ ସବୁବେଳେ ସଫଳତା ରାସ୍ତାରେ ଯିବା ପୂର୍ବରୁ ପିମ୍ପୁଡ଼ି ବିଷୟରେ ଜାଣିନେବା ଉଚିତ । ପିମ୍ପୁଡ଼ି ଯେଉଁ ଭଳି ଭାବରେ ବାରମ୍ବାର ପରାଜିତ ହୋଇ ଶେଷରେ ସଫଳ ହୋଇଥାଏ । ତାହା ମନୁଷ୍ୟ ଜୀବନରେ ଏକମାତ୍ର ମନ୍ତ୍ର ହୋଇଯିବା ଉଚିତ । ସଫଳତା ପାଇବା ପରେ ଯେଉଁ ଦୁନିଆ ଅଣଦେଖା କରିଥାଏ ସେହି ଦୁନିଆ ହିଁ ସଲାମ କରିଥାଏ । କାରଣ ଦୁନିଆ ସଫଳ ବ୍ୟକ୍ତିଙ୍କୁ ସଲାମ କରିବାକୁ ସବୁବେଳେ ପ୍ରସ୍ତୁତ ରହିଥାଏ ।
ଜୀବନରେ କେତେ ବି ସମସ୍ୟା ଆସୁ ସବୁ ପରିସ୍ଥିତିକୁ ସାହସର ସହିତ ସାମ୍ନା କରିବା ହିଁ ଜଣେ ବୀରର ଲକ୍ଷଣ । ଆଉ ଏମିତିରେ ବି ସବୁ ସମୟ ସମାନ ରହେ ନାହିଁ । ଯେଉଁ ସମୟ ଆଜି ମନୁଷ୍ୟକୁ କଷ୍ଟ ଦେଇଥାଏ ସେହି ସମୟ କେବେ ନା କେବେ ବିତିଯିବ ଏବଂ ଭଲ ସମୟ ନିଶ୍ଚୟ ଆସିବ । ସବୁ ମନୁଷ୍ୟ ନିଜ ସ୍ବପ୍ନକୁ ସଫଳ କରି ପାରନ୍ତି ନାହିଁ । ଆଉ ସେହି ବ୍ୟକ୍ତି ହିଁ ସଫଳ ହୋଇଥାଏ ଯେଉଁ ବ୍ୟକ୍ତିର ସ୍ୱପ୍ନ ସତେଜ ହୋଇଥାଏ । କାରଣ ଗୋଟିଏ କାମରେ ଲଗାତାର ଅଭ୍ୟାସ ବଜାୟ ରଖିଲେ ହିଁ ସେହି କାର୍ଯ୍ୟ ସିଦ୍ଧ ହୋଇଥାଏ । ତେଣୁ କର୍ମରୁ ବିଚ୍ୟୁତ ହେବା ପୂର୍ବରୁ ସବୁବେଳେ ମନେ ରଖିବା ଉଚିତ ଯେ ଜୀବନର ଶେଷ ମୁହୂର୍ତ୍ତ ପର୍ଯ୍ୟନ୍ତ କର୍ମ କରି ହିଁ ମନୁଷ୍ୟ ସୁଖୀ ରହିଥାଏ ।
ଜୀବନରେ କେବେବି ମନୁଷ୍ୟକୁ ନିଜ ଅତୀତକୁ ନେଇ ବସି ରହିବା ବି ଠିକ ନୁହେଁ । କାରଣ ସମୟ କେବେବି ଅଟକି ରହେନାହିଁ । ସମୟ କାହାକୁ ଅପେକ୍ଷା କରି ନଥାଏ । ତେଣୁ ମନୁଷ୍ୟ ଏହାକୁ ଯେତେ ଶୀଘ୍ର ବୁଝିଯିବ ସେତେ ଭଲ ହେବ । ସବୁବେଳେ କର୍ମ ତାତ୍ପର ରହି ସମୟକୁ ଉପଯୋଗ କରୁଥିବା ବ୍ୟକ୍ତିର କେବେ ପରାଜୟ ହୁଏନାହିଁ । ନିଜ ଅତୀତକୁ ଧରି ବସିଲେ ମନୁଷ୍ୟ କେବେବି ଆଗକୁ ବଢ଼ି ପାରିବ ନାହିଁ । ଏସବୁ ପରେ ବି ମନୁଷ୍ୟକୁ ନିଜ ଆତ୍ମୀୟଙ୍କ ସହିତ ବଞ୍ଚିବାର ଅଛି । ତେଣୁ ସଫଳ ହେବା ପରେ ବି ସମ୍ପର୍କ ଠାରୁ ଦୂରେଇ ଯିବା ଉଚିତ ନୁହେଁ ।
